დღეს საქართველოში საპარლამენტო არჩევნები გაიმართა. ქვეყნის მასშტაბით 3 657 საარჩევნო უბანი შეიქმნა.ამომრჩეველთა ერთიან სიაში 3 526 023 ამომრჩეველი იყო რეგისტრირებული.
ქვეყნის მოსახლეობამ მეათე მოწვევის პარლამენტი უნდა აირჩიოს.
150-დან 120 დეპუტატი პროპორციული წესით, ხოლო 30 — მაჟორიტარული საარჩევნო სისტემის საფუძველზე აირჩევა.
ბორჯომის მუნიციპალიტეტის მასშტაბით 32 საარჩევნო უბანი გაიხსნა. რეგისტრირებულია 26 725 ამომრჩეველი.
საარჩევნო უბნები 20:00 საათზე დაიკეტა.
ბორჯომის სპეც. უბნიდან გადასატანი ყუთი იზოლაციაში მყოფ ამომრჩევლებთან ადგილზე მივიდა
ბორჯომის №31 სპეციალური საარჩევნო უბანიც შესაბამისი პროცედურების მიხედვით, დილის 7 საათზე გაიხსნა. თუმცა, აქ არ მომხდარა კომისიის წევრებს შორის ფუნქციების გადანაწილება. კორონავირუსის პანდემიიდან გამომდინარე, ეს უბანი განსხვავებულია იმით, რომ ამომრჩეველი ხმის მისაცემად უბანზე არ მივიდოდა. იზოლაციაში ან ბინაზე მკურნალობის ქვეშ მყოფი მოქალაქეებისთვის გადასატანი ყუთი თითოეულ ამომრჩეველთან ადგილზე მივიდა. №31 სპეციალური საარჩევნო უბანზე ასეთი 23 ამომრჩეველი იყო რეგისტრირებული.
არჩევნები ბაკურიანში და საკარანტინე ზონები პანდემიის გამო, ბაკურიანში არჩევნები განსხვავებულად ჩატარდა, 2-ის ნაცვლად 3 საარჩევნო უბანში გაიმართა. აქ, ადგილობრივების გარდა, არჩევნებში მონაწილეობა ბაკურიიანში არსებული საკარანტინე ზონების სტუმრებმაც მიიღეს. გადასატანი ყუთით ისარგებლეს კარანტინში მყოფმა მოქალაქეებმა. განსაკუთრებული აქტიურობით გამოირჩეოდნენ ადგილობრივები.
