ერთიანი ნაციონალური მოძრაობის თავმჯდომარე ნიკა მელია თბილისის მერობისთვის იბრძოლებს, მოძრაობა “დროას” ლიდერი ელენე ხოშტარია კი თბილისის საკრებულოს თავმჯდომარეობის კანდიდატად დაასახელეს. ერთობლივი განცხადება მელიამ და ხოშტარიამ 23 ივლისს გააკეთეს.
“ჩემი მერობა დაასრულებს ტრადიციას, როდესაც საკრებულო მერის სურვილების და მოთხოვნების უსიტყვო და უპირობო შემსრულებელია”, – ამის შესახებ თბილისში “ერთიანი ნაციონალური მოძრაობისა” და ოპოზიციის ნაწილის მერობის კანდიდატმა, ნიკა მელიამ განაცხადა.
“ჩემი მერობა ნიშნავს იმას, რომ მრავალპარტიული საკრებულო არ იქნება ჩემი უკანა ეზო, არამედ იქნება ჩემი მთავარი მაკონტროლებელი და მოკავშირე, დამაზღვევს შეცდომებისგან და მაიძულებს, ვაკეთო უფრო მეტი და ვაკეთო უფრო უკეთესად. ჩემი მერობა ნიშნავს, რომ საკრებულოს თავმჯდომარე არ იქნება ჩემი პარტიის წარმომადგენელი. დღეს მე და ელენე ხოშტარია გამოვდივართ, როგორც მრავალპარტიული კოალიციის წარმომადგენლები. მე, როგორც მერობის კანდიდატი ჩემი მოძრაობიდან, “გირჩი – მეტი თავისუფლება”, რომელიც წარმოადგენს ვიცემერს უახლოეს მომავალში, ხოლო, ელენე, როგორც საკრებულოს თავმჯდომარეობის კანდიდატი, საკუთარი მოძრაობიდან”, – განაცხადა ნიკა მელიამ.
გარდა ამისა, “გირჩი – მეტი თავისუფლება” ვიცემერობის კანდიდატად ზურაბ ჯაფარიძეს წარადგენს, პარტია კი, შესაბამისად, მელიას და ხოშტარიას დაუჭერს მხარს.
ასევე, ცნობილია, რომ მელია-ხოშტარიას მხარს “ევროპული საქართველოც” დაუჭერს.
ნიკა მელიას განცხადებით, ნაციონალური მოძრაობა თბილისში მაჟორიტარობის კანდიდატებს არ დააყენებს და სრულად ოპოზიციურ პარტიებს დაუთმობს.
“ჩვენი პარტია არსად, არცერთ რაიონში არ დააყენებს მაჟორიტარ კანდიდატებს და მხარს დაუჭერს, საერთო, მრავალპარტიულ შეთანხმების კანდიდატებს. სწორედ ამიტომ, დღეს მე ვდგავარ, თქვენს წინაშე და ჩემი და ჩემი პოლიტიკური გაერთიანების სახელით ვაცხადებ, ჩემი მერობა დაასრულებს ტრადიციას, როდესაც საკრებულო მერის სურვილების და მოთხოვნების უსიტყვო და უპირობო შემსრულებელია”, – განაცხადა მელიამ.
თვითმმართველობის არჩევნები 2 ოქტომბერს გაიმართება. ამ დროისთვის უკვე ცნობილია, რომ “ქართული ოცნების” მერობის კანდიდატი მოქმედი მერი კახა კალაძე იქნება
