ჩემს წინა ბლოგებში უკვე დაგპირდით, რომ როგორც ღვინის ჟურნალისტი, ბევრ საინტერესო ამბავს გიამბობთ ხოლმე ღვინოზე. მათ შორის, აუცილებლად მოგიყვებით იმ საოცარ და ძალიან მაღალპროფესიონალურ სამთვიან საერთაშორისო სომელიეს სასწავლო კურსზე, რომელსაც “ხეცურიანის სომელიეს სკოლა”-ში გავდივარ და კიდევ ერთხელ ვიღებ საჭირო ცოდნას ღვინის და სხვა ალკოჰოლური სასმელების, ქართული და უცხოური მევენახეობის, მეღვინეობის, ღვინის კანონმდებლობის, HoReCa სექტორის, ენოგასტრონომიული შეხამებების, ღვინის ბიზნესის, ღვინის მარკეტინგის და სხვა მნიშვნელოვანი, ღვინოსთან დაკავშირებული სფეროების შესახებ.
სასწავლო პროგრამის ფარგლებში უკვე მოვისმინეთ ძალიან მაღალი დონის პროფესიონალების: შალვა ხეცურიანის, ნიკა ნატროშვილის, შორენა ბოჭორიშვილის, დავით მაღრაძის, დავით ჩიჩუას, გიორგი სამანიშვილის, გიორგი ბარისაშვილის, თემურ გონჯილაშვილის საინტერესო ლექციები მევენახეობასა და მეღვინეობაში, დაწყებული ამპელოგრაფიით, ვაზის მორფოლოგიით, ნიადაგმცოდნეობით(ტერუარი), და ვენახის გაშენება-ფორმირება -მოვლით, გაგრძელებული ენოლოგიური პრაქტიკებითა და სტილებით, როგორიცაა ცქრიალა, თეთრი, ვარდისფერი, წითელი და ქვევრის ღვინოების წარმოება ან კიდევ -ენოქიმია, დაავადებები და ზადები, ღვინის დავარგება;
უკვე მეორე ლექციაა, რაც საქართველოს საუკეთესო სომელიეების ტიტულის მფლობელები: თაზო თამაზაშვილი და ჯაბა ძიმისტარაშვილი გვასწავლიან სომელიეს პროფესიის მთავარ დანიშნულებას,ღვინის სერვირების პრინციპებს, ღვინის ბარათის შედგენის მნიშვნელობას და ღვინის დეგუსტაციის ხელოვნებას.
ღვინის დეგუსტაციებს ფაქტობრივად ყოველ ლექციაზე ანუ კვიარაში მინიმუმ სამჯერ ვაკეთებთ, ვსინჯავთ სხვადასხვა სტილის ქართულ თუ უცხოურ ღვინოებს, თან სტანდარტების მიხედვით ვსწავლობთ მის ორგანულ-ლეპტიკურ შეფასებას, არომატული გემოვნური თვისებების შეგრძნებას.
მაგალითად, ბოლო ლექციაზე სამი ღვინო დავაგემოვნეთ: ჩიგოგიძის მარნის ქვევრის ქისი, 2024 წლის საქართველოს საუკეთესო სომელიე საბა ქიტიაშვილის მარნის მუსკატური რქაწითელის როზე და გიუანის მეღვინეობის ტვიშის ცოლიკოური.
ერთი სიტყვით რომ გითხრათ, სამივე ძალიან კარგი, ხილისა თუ ყვავილოვანი არომატებით მდიდარი და გემოვნურად დაბალანსებული ღვინო იყო. ამ ღვინოებში ისეთი არომატების თაიგული აღმოვაჩინეთ, როგორიცაა: კომში, გულაბი მსხალი,ატამი, გარგარის ჩირი, თეთრი ბლისა და ლეღვის მურაბის სურნელი, კარამელი, ვარდი, ციტრუსი, ვაშლი, ტროპიკული ხილი.
უდაოდ, თქვენც გირჩევთ, რომ მოიძიოთ და მიირთვათ ეს ღვინოები.
