გარემოს დაცვისა და სოფლის მეურნეობის მინისტრი დავით სონღულაშვილი ვაზისა და ღვინის საერთაშორისო ორგანიზაციის (OIV) გენერალურ დირექტორ ჯონ ბარკერს შეხვდა.
მხარეებმა საქართველოში მევენახეობა-მეღვინეობის დარგის განვითარების, მსოფლიო მასშტაბით ქართული ღვინის ცნობადობის გაზრდის და ბაზრების დივერსიფიკაციის საკითხებზე იმსჯელეს.
დავით სონღულაშვილმა მადლობა გადაუხადა OIV-ის გენერალურ დირექტორს მრავალწლიანი ნაყოფიერი თანამშრომლობისთვის და ერთობლივი პროექტების მნიშვნელობას გაუსვა ხაზი
„შეხვედრაზე განვიხილეთ შემდგომი თანამშრომლობის საკითხები; აგრეთვე, როგორ შეიძლება ქართული ღვინის ცნობადობის მეტად გაზრდა. ვაზისა და ღვინის საერთაშორისო ორგანიზაციის (OIV) მხარდაჭერით, დარწმუნებული ვარ, კიდევ უფრო მეტ საინტერესო პროექტს განვახორციელებთ, რომელიც ხელს შეუწყობს ქართული ღვინის პოპულარიზაციას და მის დამკვიდრებას საერთაშორისო ბაზრებზე”, — აღნიშნა დავით სონღულაშვილმა.
ჯონ ბარკერმა მჭიდრო პარტნიორობის მნიშვნელობაზე ისაუბრა და აღნიშნა, რომ საქართველო არის ქვეყანა, სადაც ღვინო არა მხოლოდ ეკონომიკური რესურსია, არამედ ისტორიისა და კულტურის ნაწილი. მისი თქმით, საქართველო ძალიან კარგად მუშაობს ღვინის ხარისხის გაუმჯობესებაზე, ვენახების ფართობის ზრდასა და ქართული ღვინის საერთაშორისო აღიარებაზე.
