თბილისში ღვინის ფესტივალი „Wine Ambassadors 2025“ გაიმართა. ფესტივალის ორგანიზატორია «ღვინისა და გასტრონომიის ამბასადორები საქართველოდან».
ფესტივალი შარშან გაიმართა პირველად და საკმაოდ დიდი დაინტერესება გამოიწვია. მისი მიზანია, ხელი შეუწყოს ადგილობრივ მცირე მარნებს თავიანთი ღვინის პოპულარიზაციასა და გაყიდვებში, როგორც ქართულ, ისე — საერთაშორისო ბაზრებზე. ასევე — ღვინის ტურიზმის მხარდაჭერა და ხელშეწყობა.
წელს ფესტივალში ასამდე ოჯახური მარანი მონაწილეობდა.
ფესტივალმა ღვინის პროფესიონალებს, მომხმარებლებს, ჰორეკა სექტორისა და კომერციული კომპანიების წარმომადგენლებს უმასპინძლა.
ფესტივალის ფარგლებში სტუმრები გაეცნენ მცირე საოჯახო მარნებისა და ღვინის კომპანიების პროდუქციას, დააგემოვნეს სხვადასხვა სახეობის და სტილის ღვინოები.
გარდა ამისა, ფესტივალის სტუმრებს შესაძლებლობა ჰქონდათ, ღვინოსთან დაკავშირებით საგანმანათლებლო მასტერკლასებსაც დასწრებოდნენ შემდეგ თემებზე: დაძველებული ღვინის დეკანტაცია; ადგილწარმოშობის დასახელების სპეციფიკაციის წერისა და რეგისტრაციის პროცედურები.
მასტერკლასებს წარმართავდნენ: ლაშა ბოდაველი (მეღვინეობა «ეთნო ოკამი»-ს გენერალური მენეჯერი, კავკასიის საერთაშორისო უნივერსიტეტის მევენახეობა-მეღვინეობის ფაკულტეტის კოორდინატორი, უმაღლესი განათლების დარგობრივი კოორდინატორი) და საბა ქიტიაშვილი (ღვინის ეროვნული სააგენტოს სადეგუსტაციო კომისიის წევრი,მეღვინე,»სფრინგ ფილდსი»-ს დამუძნებელი, ხეცურიანის სომელიეს სკოლის პროგრამის ხელმძღვანელი).
ფესტივალი ადგილობრივ ბაზარზე ქართული ღვინოპროდუქციის პოპულარიზაციის სახელწიფო პროგრამის ფარგლებში გაიმართა, რომელსაც ღვინის ეროვნული სააგენტო, გარემოს დაცვისა და სოფლის მეურნეობის სამინისტროსთან კოორდინაციით, უკვე მეორე წელია, ახორციელებს. პროგრამის ფარგლებში, საქართველოს მასშტაბით ღვინის გამოფენები, კონკურსები და ფესტივალები იმართება, რაც მნიშვნელოვანია ღვინის ტურიზმის პოტენციალისა და ღვინის სამომხმარებლო კულტურის გაზრდისთვის.
პირადად მე, როგორც ღვინის ჟურნალისტი, წელს პირველად ვსტუმრობდი ამ ფესტივალს, «ხეცურიანის სომელიეს სკოლის» კურსელებთან ერთად და სიმართლე გითხრათ, მართლაც საკმაოდ ბევრი საინტერესო ღვინო აღმოვაჩინეთ, თუმცა, ამ ეტაპზე თავს შევიკავებ დაკონკრეტებისაგან და მხოლოდ ფოტოგალერეას შემოგთავაზებთ.
