ბიოლოგიურ მეურნეობათა ასოციაცია „ელკანა“-მ დაინტერესებული საზოგადოებისათვის ხორბლის ენდემური სახეობების, მარცვლოვანი და პარკოსანი კულტურების ადგილობრივი ჯიშებისგან დამზადებული კერძების დეგუსტაცია გამართა. Elkana — Organic Farming & Rural Tourism Network in Georgia
ღონისძიების მიზანი იყო, დაინტერესებულ რესტორატორებს, პურის მცხობლებს, სპეციალიზებულ მაღაზიებს, კულინარიული სკოლების წარმომადგენლებსა და ბლოგერებს გაეცნოთ ქართული ენდემური ხორბლის, ადგილობრივი მარცვლოვანი და პარკოსანი კულტურებისგან დამზადებული კერძები.
ასევე ძალიან მნიშვნელოვანი მიზანი იყო ამ კულტურების პოტენციალის წარმოჩენა და მწარმოებლებთან პირდაპირი კავშირის დამყარებით ღირებულებათა მოკლე ჯაჭვების განვითარების ხელშეწყობა.
დეგუსტაციის დაწყებამდე “ელკანა»-ს დირექტორმა, მარიამ ჯორჯაძემ, სტუმრებს მრავალმხრივ საინტერესო პრეზენტაცია წარუდგინა მათ მიერ განხორციელებული, bp Georgia-ს მიერ დაფინანსებული პროექტის შესახებ — „აგრარული ბიომრავალფეროვნების კონსერვაცია და აღდგენა საქართველოს მეურნეობებში“ .
პრეზენტაციის შემდეგ შეხვედრა კითხვა-პასუხის რეჟიმში გაგრძელდა, სადაც “ელკანა”-ს წარმომადგენელმა, თამაზ დუნდუამ დაინტერესებულ რესტორატორებს თანამშრომლობის სხვადასხვა გზა შესთავაზა იმ შემთხვევისთვის, თუ ისინი მოინდომებენ, რომ თავიანთ რესტორანში «ელკანას»მიერ გადარჩენილი ძველი ქართული ხორბალი, პარკოსნები თუ ბოსტნეული გამოიყენონ.
დეგუსტაცია კი ნამდვილად ძალიან გემრიელი და აღმოჩენებით სავსე იყო, თუნდაც იმიტომ, რომ სტუმართა დიდი ნაწილი ზოგიერთ პროდუქციას პირველად სინჯავდა.
როგორც ღონისძიების საორგანიზაციო კომიტეტის ერთ-ერთმა ხელმძღვანელმა, ბევრი კულინარიული პროექტის სულის ჩამდგმელმა, ქეთი კვიჭიძემ ჩვენთან საუბარში აღნიშნა, “დღეს ჩვენს სტუმრებს შესაძლებლობა ჰქონდათ, გაესინჯათ: ძაძა, ცერცვი, ღომის ღომი, ცულისპირა, მუხუდო,ფეტვი. დოლი, დიკა, მახა, შაფხის და ზანდურის პურები, შაფხასგან მომზადებული ატრია , დიკასგან მომზადებული ჰასუთა, ასკილის ლუდი და სხვა მრავალი. ასევე გამოფენილი გვქონდა გადარჩენილი ჭოპორტის პომიდვირის, შაშკლავის, რეჰანის, მეგრული გოგრის და სხვა საინტერესო თესლები. კერძები დეგუსტაციისთვის მოგვიმზადეს Hilton Garden Inn Riverview «tbilisi» შეფებმა. მათთვისაც გამოცდა იყო ძველებურ პარკოსნებთან შეხება. მდგრადი გასტრონომია ადგილობრივი პროდუქტების განვითარებით იწყება, ამიტომ ამ საქმიანობის განვითარებას მრავალმხრივი მხარდაჭერა სჭირდება”.
ღონისძიება გაიმართა — Georgian Gastronomic & Rural Tourism Association მხარდაჭერით.
