14 მაისს ბიოლოგიურ მეურნეობათა ასოციაცია „ელკანას“ ორგანიზებით ტუროპერატორებისა და გიდებისთვის ჩატარდა აგრო-გასტრო ინფოტური „ელაკანას“ შინაურ ცხოველთა საკონსერვაციო მეურნეობაში.
„ელკანას“ შინაურ ცხოველთა საკონსერვაციო მეურნეობა 2011 წლიდან ფუნქციონირებს სოფელ ზემო ხოდაშენში, მეურნოების მიზანია ადგილობრივი ჯიშების კონსერვაცია, პოპულარიზაცია და დაინტერესებულ ფერმერთა შორის გავრცელება. ამჟამად მეურნეობა მუშაობს თუშური ცხენის, პირუტყვის ადგილობრივი ჯიშების (ქართული მთის ძროხა — ჯილაგი, ფშავ-ხევსურული, და კახური ღორი), ქათმის ადგილობრივი პოპულაციების (მეგრულა, ნაცარა) და ჯავახური ბატის კონსერვაციაზე.
„ელკანას“ აგრო-გასტრო ინფოტურის ფარგლებში 15 ტურისტული კომპანიის წარმომადგენელი ტუროპერატორი და გიდი ესტუმრა „ელკანას“ შინაურ ცხოველთა საკონსერვაციო მეურნოებას. ისინი გაეცვნენ „ელკანას“ საკონსერვაციო საქმიანობას და ინფორმაცია მიიღეს „ელკანას“ აგროტურისტული შეთავაზებების შესახებ. ვიზიტის ბოლოს კი დააგემოვნეს კახური ბიო ღვინო და ადგილობრივი პროდუქტები.
„ელკანას“ შინაურ ცხოველთა საკონსერვაციო მეურნეობის შემდეგ ინფოტურის მონაწილეები ეწვივნენ „მეღვინეობა რტონს“ სოფელ რუისპირში. დაათვალიერეს მეღვინეობა, მიიღეს ინფორმაცია ტურისტული შეთავაზებების შესახებ, დააგემოვნეს ადგილობრივი კერძები და მონაწილეობა მიიღეს ჩურჩხელის ამოვლებისა და ხინკლის მოხვევის მასტერკლასში.
