„ღვინის დაბადების საერთაშორისო დღე“ დაფუძნდა საქართველოს სომელიეთა ასოციაციის პრეზიდენტის, შალვა ხეცურიანის ინიციატივით და ყოველწლიურად აღინიშნება საერთაშორისო სომელიეთა ასოციაციის 75 წევრ ქვეყანაში.
საქართველოში წელს ამ დღესასწაულის აღნიშვნა 11 სექტემბერს ქუთაისში მრავალფეროვანი ღონისძიებებით შედგება:
• გაიმართება სამეცნიერო კონფერენცია – “ღვინის საწყისი”. კონფერენცია ტარდება მევენახეობა-მეღვინეობისა და მასპინძლობის სფეროების წარმომადგენლებისთვის და მედიისთვის.
• დავით კაკაბაძის სახელობის სამხატვრო გალერეაში გაიმართება გამოფენა – “მასპინძლობის ფერები”. გალერეის სივრცე გარდაიქმნება უნიკალურ გამოცდილებად: თითოეულ ნამუშევართან მოთავსებული იქნება შალვა ხეცურიანის „მასპინძლობის მანიფესტის“ ტექსტები. თითო ფრაზა და მონაკვეთი არა ნახატის აღწერა, არამედ მისი შინაგანი რეზონანსის გახსნა იქნება — თითქოს სიტყვა და ფერი ერთიანად წარმოაჩენენ იმას, რაც ქართველთა მასპინძლობას საუკუნეების მანძილზე განსაკუთრებულად აქცევს.
ექსპოზიციაში წარმოდგენილია გალერეის ოქროს ფონდიდან შერჩეული 23 გამორჩეული ნამუშევარი — ნიკო ფიროსმანის, ლადო გუდიაშვილის, ელენე ახვლედიანის, ფელიქს ვარლამიშვილის, გიგო გაბაშვილის, უჩა ჯაფარიძის და სხვა დიდოსტატების შემოქმედება.გამოფენის კურატორია, გალერეის დირექტორი, ხელოვნებათმცოდნე, ქალბატონი ელისო ჩოგოვაძე.
„მასპინძლობის ფერები“ არის დიალოგი წარსულსა და აწმყოს შორის: მხატვრობა, სიტყვა და ღვინის კულტურა ერთიანდებიან, რათა დამთვალიერებელს შესთავაზონ არა მხოლოდ ვიზუალური, არამედ სულიერი მოგზაურობაც — ქართული სტუმართმოყვარეობისა და მისი მარადიული სიბრძნის გულში.
• ლადო მესხიშვილის თეატრში კი შალვა ხეცურიანის ნოველის მიხედვით გიორგი სიხარულიძის უნიკალური სპექტაკლის,
„ღვინის დაბადება“ — პრემიერა და ნანა ჯორჯაძის კინოფილმის ჩვენება შედგება.
სცენურ სამყაროს განსაკუთრებულ შთაბეჭდილებას სძენს ქუთაისის სიმღერისა და ცეკვის სახელმწიფო აკადემიური ანსამბლისა და იოსებ კეჭაყმაძის სახელობის კამერული გუნდის მონაწილეობა — ისინი ერთიანდებიან მოქმედებაში როგორც სცენის ორგანული ნაწილი, ეპიზოდებში, სადაც ცოცხალი მუსიკა და ხმა სპექტაკლის დრამატურგიას კიდევ უფრო ამაღლებს.
და განსაკუთრებული ჩვენება – ნანა ჯორჯაძის ფილმი “ღვინის ნულოვანი მერიდიანი”, რომელიც ქუთაისური პრემიერის შემდეგ კვლავ დაუბრუნდება სცენას, როგორც ღვინის გზავნილი მსოფლიოსკენ!
ეს არის საღამო, სადაც თეატრი და კინო ერთიანდებიან, რათა გითხრან ერთი ამბავი – “ღვინო იწყება აქ, საქართველოში!”
შემოგვიერთდით და გახდით ისტორიის ნაწილი!
