6 ოქტომბერს იაკობ ტრიპოლსკის სახელობის დუშეთის სახალხო თეატრში პრემიერა გაიმართა.
თითქმის 150 წლოვან სახალხო თეატრს 7-წლიანი პაუზა ჰქონდა და ადვილი წარმოსადგენია, როგორი სიხარულით შეხვდენენ ადგილობრივები თეატრის გაცოცხლებასა და სცენაზე მსახიობების დაბრუნებას. რეგიონების კულტურული ცხოვრების განვითარებისთვის სახალხო თეატრების ამოქმედებას ხომ განსაკუთრებული მნიშვნელობა აქვს.
ახალგაზრდა ნიჭიერმა რეჟისორმა, მარიამ სიხარულიძემ, თავის გუნდთან ერთად, გოდერძი ჩოხელის შემოქმედებასა და გუსტავ ოტისის პიესა „პასპორტი“-ზე დაყრდნობით შექმნა სცენარი, რომელიც დუშეთის თეატრის და დუშელების ემოციურ ისტორიას, ურთიერთპატივისცემას, პატრიოტულ გრძნობებს და ადამიანთა გზას წარმოაჩენს.
სპექტაკლსაც „ადამიანთა გზა“ უწოდეს და მთელმა დასმა სული და გული ჩადეს, რათა თავიანთი სათქმელი მაყურებლამდე ემოციურად და დიდი სიყვარულით მიეტანათ.
აი, ის მსახიობებიც, რომელთა პროფესიონალურმა შესრულებამ მაყურებლის გულწრფელი ოვაციები დაიმსახურეს: ელენე პაპიაშვილი, მანანა დათოშვილი, ნიკოლოზ ხუციშვილი, ნესტან ბარათაშვილი, საბა ნუცუბიძე, მედეა ბექაური.
მაყურებელმა განსაკუთრებული სიყვარულით მიიღო მოწვეული დამწყები მსახიობის, თეატრალური უნივერსიტეტის სტუდენტის, საბა ნუცუბიძის შესრულებული მთავარი გმირის, ახალგაზრდა ლუკას როლი, რომელიც „დუშეთს არ ტოვებს, ბრუნდება და დგამს სპექტაკლს — ადამიანთა გზა“.
აქვე აღვნიშნავ იმასაც, რომ საბა ნუცუბიძისთვის ეს როლი გახლდათ მეორე დიდი შესაძლებლობა რეჟისორ მარიამ სიხარულიძისგან, ტყიბულის სახალხო თეატრში განხორციელებულ სპექტაკლში — „უსამშობლო კაცი“ — ბრწყინვალედ შესრულებული მთავარი როლის შემდეგ. მარიამ სიხარულიძის ამ სპექტაკლმა გასულ წელს საერთაშორისო ფესტივალ ,,თეატრალური იმერეთი 2023“ -ის გრანპრი დაიმსახურა, ხოლო სიღნაღის თეატრალურ ფესტივალზე მეორე საპრიზო ადგილი მიიღო და ფესტივალის საზეიმო დახურვის ღონისძიებაზე ფულადი პრემიით — 10 000 ლარით დაჯილდოვდა.
მარიამ სიხარულიძის რეჟისორობით დადგმულ პრემიერას დუშეთში, ადგილობრივ მცხოვრებლებთან ერთად, ქალაქის მერი მაცაცო ნარიმანიძე, თვითმმართველობის წარმომადგენლები და დედაქალაქიდან თუ სხვა ქალაქებიდან ჩამოსული სტუმრები ესწრებოდნენ.
აღსანიშნავია, რომ ეს პროექტი საქართველოს კულტურისა და სპორტის სამინისტროს კონკურსის — „სამოყვარულო/მუნიციპალური/კერძო თეატრალური დასების საქმიანობის ხელშეწყობა“ გამარჯვებულია.
ინფორმაციისათვის: დუშეთის თეატრი ერთ-ერთი უძველესია საქართველოში მოქმედ სახალხო თეატრთა შორის. საქართველოში მე-19 საუკუნის მეორე ნახევარში დაიწყო სცენისმოყვარეთა კოლექტივების ჩამოყალიბება, ხოლო ქ. დუშეთში, სწორედ ამ პერიოდში — 1880 წლის 20 იანვარს, დაფუძნდა პირველი სახალხო თეატრი, პირველ სპექტაკლად კი გიორგი ერისთავის ,,გაყრა» აირჩიეს, რომელშიც მთავარი როლი ნატო გაბუნიამ შეასრულა.
