საქპატენტსა და ქალაქ თბილისის მუნიციპალიტეტის მერიას შორის ურთიერთთანამშრომლობის მემორანდუმი გაფორმდა, რომლის მიზანია ინტელექტუალური საკუთრების დაცვის მიმართულებით ახალგაზრდების ცნობიერების ამაღლება. მემორანდუმს ხელი მოაწერეს საქპატენტის თავმჯდომარემ სოსო გიორგაძემ და ქალაქ თბილისის მუნიციპალიტეტის მერიის კულტურის, განათლების, სპორტისა და ახალგაზრდულ საქმეთა საქალაქო სამსახურის უფროსმა ირაკლი გვილავამ.
მემორანდუმის ფარგლებში გათვალისწინებულია ერთობლივი სასწავლო და საგანმანათლებლო ღონისძიებების, მათ შორის, სეზონური სკოლების, ახალგაზრდული ბანაკების, კონფერენციების, ტრენინგებისა და სემინარების გამართვა, ასევე სხვა აქტივობების დაგეგმვა და განხორციელება.
საქპატენტი განსაკუთრებულ ყურადღებას უთმობს სახელმწიფოში სასწავლო და სამეცნიერო სფეროს გაძლიერებას ინტელექტუალური საკუთრების დაცვის მიმართულებით. ამ მხრივ აღსანიშნავია საქპატენტის, ინტელექტუალური საკუთრების მსოფლიო ორგანიზაციისა (WIPO) და ქუთაისის ტექნოლოგიური უნივერსიტეტის (KIU) ერთობლივი საერთაშორისო სამაგისტრო პროგრამა, რომელიც მნიშვნელოვნად შეუწყობს ხელს საქართველოში ინოვაციური ეკოსისტემის ჩამოყალიბებასა და ქართველ ახალგაზრდებს შეუქმნის პროფესიული განვითარების ახალ შესაძლებლობებს.
ამ მიმართულებით განსაკუთრებით მნიშვნელოვანია საქართველოს პრემიერ-მინისტრის ირაკლი კობახიძის ინიციატივა, რომლის შედეგად, ქუთაისში, პარლამენტის ყოფილი შენობა თანამედროვე სტანდარტების მაღალტექნოლოგიურ ცენტრად გარდაიქმნება. ცენტრში განთავსდება სხვადასხვა სამეცნიერო-კვლევითი და სასწავლო ლაბორატორია, მათ შორის, საქპატენტის ინტელექტუალური საკუთრების სწავლებისა და გადამზადების ცენტრი, რომელიც გააერთიანებს ინტელექტუალური საკუთრების სფეროში ცოდნის გავრცელებასთან დაკავშირებულ ყველა ფუნქციას და აღჭურვილი იქნება თანამედროვე, ინოვაციური ტექნოლოგიებით.
საქპატენტი, როგორც საქართველოს ინტელექტუალური საკუთრების სფეროში პოლიტიკის განმსაზღვრელი უწყება, აქტიურადაა ჩართული ინოვაციებისა და ტექნოლოგიების განვითარებაზე მიმართულ ისეთ ღონისძიებებში, როგორიცაა: ათასწლეულის ინოვაციის კონკურსი, მოსწავლე გამომგონებელთა და მკვლევართა კონკურსი „ლეონარდო და ვინჩი“ და სხვადასხვა სახის სასწავლო სემინარები სკოლის მოსწავლეებთან თუ სტუდენტებთან.
ინტელექტუალური საკუთრების დაცვის მიმართულებით, საქპატენტსა და ქალაქ თბილისის მერიას შორის აქტიური თანამშრომლობა კიდევ უფრო მეტად შეუწყობს ხელს ქვეყანაში ინოვაციური იდეების გენერირებას, ახალგაზრდებში პროფესიული უნარ-ჩვევების ამაღლებასა და ცოდნაზე დაფუძნებული ეკონომიკის სტიმულირებას.
