რთველი კახეთში, ტრადიციულად, დედოფლისწყაროს მუნიციპალიტეტიდან დაიწყო.
2 სექტემბრის მონაცემებით, ღვინის საწარმოებმა 3,5 ათასამდე ტონა ყურძენი გადაამუშავეს.
რთველი კახეთის სხვა მუნიციპალიტეტებში ყურძნის შესაბამის კონდიციაში შესვლის მიხედვით, ეტაპობრივად დაიწყება.
საკოორდინაციო შტაბში 200-მდე ღვინის კომპანიაა დარეგისტრირებული, რომლებიც ყურძნის მიღება-გადამუშავების პროცესში ჩაერთვებიან.
„მნიშვნელოვანია, რომ ყურძნის ჩასაბარებელი ფასები განსაზღვრულია ხარისხის მიხედვით; დაფასდება ის მევენახე, რომელიც მოიყვანს ხარისხიან და კონდიციურ ყურძენს. ჩვენი რეფორმის მიზანია, რომ მევენახე დაინტერესებული იყოს, მოიყვანოს ხარისხიანი ყურძენი. ეს არის პირველი წელი, როდესაც დაფიქსირდა ფასთა სხვაობა ხარისხიან/კონდიციურსა და დაზიანებულ/არაკონდიციურ ყურძენს შორის. ვფიქრობთ შემდეგ წლებში კიდევ უფრო მეტი ყურადღება დაეთმობა ხარისხიანი ყურძნის მოყვანას. რთველში გათვალისწინებულია სოციალური ფაქტორიც, შევქმენით ყველა პირობა, რომ მევენახეებმა შეძლონ მოსავლის სრულად დაბინავება, თუმცა, ხარისხის მიხედვით შესაბამისი ფასებით“, — აღნიშნა ღვინის ეროვნული სააგენტოს თავმჯდომარე ლევან მეხუზლამ.
2025 წლის 3 სექტემბრის მონაცემებით, კახეთში გადამუშავებულია 5 ათასი ტონა ყურძენი.
