ახალ უბანსა და არდაგნის დასახლებაში, ასფალტის საფარის მოწყობის მიმდინარე და დასრულებულ სამუშაოებს ბორჯომის მუნიციპალიტეტის პირველი პირები ადგილზე გაეცნენ.
ახალ უბანში გზის მოასფალტების პარალელურად,დამონტაჟდა გარე განათება,ასევე აქტიურად მიმდინარეობს დასასვენებელი სივრცისა და საბავშვო ატრაქციონების მოწყობა.
***
ბორჯომის მუნიციპალიტეტის სოფელ ბეშეთში, პირველად, დასახლების არსებობის მანძილზე, საგზაო ინფრასტრუქტურა მოეწყობა. სამუშაოები ამ დროისთვის აქტიურად მიმდინარეობს. ასფალტო-ბეტონის საფარი გზის 700 მეტრიან მონაკვეთზე მოეწყობა.
გზის მოასფალტების პარალელურად, პროექტის ფარგლებში, მძიმე ტექნიკის დახმარებით სოფელი ვარდგინეთის ბეშეთთან დამაკავშირებელი გზა გაიწმინდა და მოსწორდა, რაც მოქალაქეებს გადაადგილებას გაუმარტივებს.
***
გზის სარეაბილიტაციო სამუშაოები მიმდინარეობს
სოფელ მზეთამზეშიც. ბორჯომის გამგეობის ინფორმაციით, სოფელში ასფალტო ბეტონის საფარი 820მ სიგრძის მონაკვეთზე დაიგება. სამუშაოები მზეთამზეში მისასვლელი გზიდან დაიწყო და სოფლის ცენტრში, ე.წ. „კალოს“ მოედანზე დამთავრდება. მოწესრიგდება ასევე ეზოებში შესასვლელები.
«ადგილობრივების თქმით, სოფლის მაცხოვრებლებს წლებია გრუნტის გზით გადაადგილება უწევდათ, რაც მათთვის დიდი დისკომფორტი იყო, მოწესრიგებული გზა კი მნიშვნელოვნად შეუწყობს ხელს, როგორც საცხოვრებელი გარემოს გაუმჯობესებას, ასევე საკურორტო ზონაში დამსვენებლების მოზიდვას», – აცხადებენ ბორჯომის გამგეობაში.
პროექტის ფარგლებში სამუშაოები უკვე დასრულებულია სოფელ ყვიბისში და რველში.
მიმდინარე სამუშაოები საქართველოს რეგიონებში განსახორციელებელი პროექტების ფონდისა და ადგილობრივი ბიუჯეტიდან ფინანსდება.
